Россия Ташқи ишлар вазири Сергей Лавров Су-24 ҳарбий бомбардимончи самолётининг Туркия томонидан уриб туширилиши Россия авиацияси ИШИДнинг нефть саноатига ҳужум бошлаб, нефть ташувчи транспортларини йўқ қила бошлагач рўй берганига эътибор қаратди.

"Шуни айтаманки, кеча уриб туширилган Россия самолёти ИШИДнинг ноқонуний нефти ташилиши ва сотилишига қарши кураш олиб бораётганди. ИШИД ўз назорати остидаги ҳудудларда нефть саноати ташкил этганди", дейди Лавров.

Россия ТИВ раҳбари Су-24 самолёти ИШИДнинг нефть ташувчи транспорт воситаларини йўқ қилишда самарали ҳаракатларни амалга ошираётгани маълум қилинганидан кейин юз берганини таъкидлаган.

18 ноябрь куни Россия ҳарбий самолётлари Сурияда жангариларнинг 500га яқин нефть ташувчи транспортини йўқ қилгани хабар қилинганди.

Бугун Медведев Туркияни ИШИДдан нефть сотиб олишда айблади.

Шунингдек, НАТОнинг собиқ генерали Уэсли Кларк Туркия ИШИДдан нефть сотиб олаётган бўлиши мумкинлиги ҳақида айтиб ўтган.

Эслатиб ўтамиз, 24 ноябрь куни тонгда Туркия—Сурия чегарасида Суриядаги ҳарбий операцияда иштирок этаётган Россиянинг Су-24 самолёти уриб туширилди. Туркиянинг таъкидлашича, самолёт мамлакат ҳаво кенгликларини бузиб ўтган.

Россия Мудофаа вазирлигининг қайд этишича, Россия самолёти Туркия ҳудудига кирмаган.