Россия Туркия томонидан Су-24 самолёти уриб туширилиши борасида НАТОдан холисликни кутмаяпти, бироқ альянс билан бундай воқеаларнинг олдини олиш бўйича келишув тузишга тайёр. Бу ҳақда Россия ташқи ишлар вазири ўринбосари Сергей Рябков 25 ноябрда АҚШ Давлат котиби ўринбосари Роуз Готтемюллер билан учрашувидан кейин маълум қилди.

“Менинг фикримча, НАТОдан холисликни кутмаса бўлади, чунки иттифоқчи сифатида Туркиянинг ёни олинади”, деб айтди Рябков.

Рябков бундай “мисли кўрилмаган ва жиноий ҳужумларга” келгусида йўл қўйиб бўлмаслик бўйича бир қатор чораларни амалга оширишга чақирди. Унинг айтишича, Москва НАТО билан тегишли келишув тузишни кўриб чиқишга тайёр. “Агар НАТО ташкилот, альянс сифатида қандайдир жамоавий кўп томонлама ҳужжат фойдасига муносабатни шакллантирса, унда биз бу ҳужжатни кўриб чиқамиз. Бироқ катта ҳисобда бу велосипедни қайта ихтиро қилишдек гап”, деб айтди Рябков.

Шу билан бирга Рябков Суриядаги операцияда иштирок этаётган кучларни миллий армиялар штаби бошқариши туфайли бундай келишувларни икки томонлама асосда тузиш кераклигини айтди.

Рябков АҚШ бундай нохуш воқеаларнинг “жиддийлиги ва йўл қўйиб бўлинмаслигини” англашига умид билдирди. У Москва ва Вашингтон Сурия ҳаво ҳудудида нохуш воқеаларнинг олдини олиш бўйича келишув имзолаганини эслатиб ўтди. Шу билан бирга Рябков ушбу ҳужжат АҚШ бошчилигидаги коалициянинг қолган иштирокчилари, жумладан Туркияга ҳам тааллуқлигига ишонч билдирди.