Туркия томонидан уриб туширилган, Россияга тегишли Су-24 самолёти учувчиларидан бирини суриялик ҳарбийлар эвакуация қилишган. Бу ҳақда Al Mayadeen нашри хабар тарқатган.

Қайд этилишича, учувчини қидирган гуруҳ 6 соатдан кейин у билан алоқани тиклашган. Сурия махсус хизматлари учувчини жангарилар ҳудудидан олиб чиқиш учун 2 соат вақт сарфлашгани, айни вақтда у Россиянинг ҳарбий авиабазаси Хмеймимда экани айтилган.

Бу маълумот ҳозирча тасдиқланмаган.

Дастлаб, айрим ОАВларда самолётнинг ҳар икки учувчиси ҳалок бўлгани ҳақида хабар берилган, лекин бу маълумотлар расман тасдиқланмаганди.

Бундан олдинроқ, Сурия мухолифати учувчилардан бирининг танасини ҳукумат қамоғида бўлган вакилларидан бирига алмаштирмоқчи бўлгани хабар қилинганди.

Шунингдек, Суриядаги туркманлар гуруҳи вакили учувчиларнинг ерга тушгач, отиб ташлангани ҳақида маълумот берган.

Кейинроқ, туркманлар Су-24 самолётининг катапульта қилган учувчиларига ҳаводалигидаёқ ўт очишгани видеоси пайдо бўлди.

Эслатиб ўтамиз, 24 ноябрь куни тонгда Туркия—Сурия чегарасида Суриядаги ҳарбий операцияда иштирок этаётган Россиянинг Су-24 самолёти уриб туширилди. Туркиянинг таъкидлашича, самолёт мамлакат ҳаво кенгликларини бузиб ўтган.

Россия Мудофаа вазирлигининг қайд этишича, Россия самолёти Туркия ҳудудига кирмаган.