«Ўзбекистон темир йўллари» АЖнинг электрлаштирилган йўллари Ўзбекистондаги темир йўл узунлигининг 29 фоизини ташкил қилади. Бу ҳақда «Экономическое обозрение» нашри IX Халқаро саноат ярмаркаси ва кооперацион биржаси вақтида компания вакили берган маълумотга таяниб хабар тарқатди.

«Ўзбекистон темир йўллари» АЖ берган маълумотга кўра, ҳозирги кунда 1863,5 км темир йўл ҳудуди электрлаштирилган.

Хусусан сўнгги йилларда барпо этилган икки изли «Жиззах-Янгиер» электрлаштирилган темир йўлининг узунлиги 187 км ташкил қилади. «Мароқанд-Қарши» электрлаштирилган темирйўлининг узунлиги эса 140 км узунликдан иборат.

Ҳозирги вақтда 325 км узунликдаги «Қарши – Термиз» ва 372,5 км узунликдаги «Мароқанд – Бухоро» темир йўл йўналишларини электрлаштириш ишлари амалга оширилмоқда. «Ангрен – Поп» янги йўлини қуриш ишлари давом этмоқда.

«Ўзбекистон темир йўллари» берган маълумотга кўра, республика ҳудудидан ўтган темирйўл узунлиги 6464 км.ни ташкил қилади. Шундан 4650 км умумий фойдаланиш учун мўлжалланган.