19 ноябрь куни Қозоғистон президенти ялпи деклорация қилиш тўғрисидаги қонунни имзолади. Унга кўра, эндиликда Қозоғистоннинг вояга етган барча фуқаролари, оралманлар (мамлакатга турли давлатлардан кўчиб келган этник қозоқлар) ва яшаш учун рўйхатдан ўтган шахслар даромадлари ва мол-мулклари тўғрисида декларацияни мажбурий тартибда тақдим этадилар.

Ушбу тартиб рўйхатдан ўтказиладиган мол-мулк, банк ҳисоб рақамларида 3,4 миллион тангадан зиёд жамғармаси ёки бюджетдан олинадиган маблағлардан ташқари ҳар қандай даромадга эгалик қилиш ҳуқуқи бўлган вояга етмаганларга ҳам тааллуқли. Шунингдек, рўйхатдан ўтказилиши тақозо этиладиган мулкларга эга хорижликлар ҳам декларация қилишлари лозим. Яқин кунларда декларация шакллари, уларни тўлдириш қоидалари ва тақдим этиш муддатлари ўрнатилади.

Қайд этилишича, мазкур қонун босқичма-босқич амалга оширилади. Биринчи босқичда 2017 йилда аҳолининг нисбатан тайёр қисми, яъни депутатлар, судьялар, давлат хизматчилари ва уларнинг турмуш ўртоқлари ялпи деклорация қилиш жараёнига жалб этилади. Иккинчи босқич эса 2020 йилдан бошланади. Унда аҳолининг қолган қисми ҳам декларация тақдим этилиши мажбурий тартибда амалга оширилади.