Жиззахнинг «Сўғдиёна» жамоаси Олий лигадаги ўрнини сақлаб қолди. Биринчи лигада 2-ўринни эгаллаб ўтиш турнирида иштирок этиш ҳуқуқини қўлга киритган Тошкентнинг «Оқ-тепа» жамоасига қарши учрашувда ғалаба қозонган жиззахликлар кейинги йилда ҳам Ўзбекистоннинг асосий чемпионатида иштирок этадиган бўлди.

Учрашувнинг биринчи бўлими 29-дақиқасида «Сўғдиёна» футболчиси Санжар Рашидов ҳисобни очди. Унинг олис масофадан йўллаган зарба аввал дарвоза тўсинига, сўнгра дарвозабон Михаил Наумовга тегиб, тўрга бориб тушди.

Иккинчи бўлимнинг 8-дақиқасида биринчи лига вакиллари ҳисобни тенглаштиришди. Собиқ «Пахтакор» ҳужумчиси Темур Ҳакимов рақиб дарвозабони билан бирга бир вазиятга чиқиб борди ва жиззахликлар посбони Спиродоновни доғда қолди.

Ўйиннинг сўнгги қисмида «Оқ-тепа» вакиллари ҳисобда олдинга чиқиб олишлари мумкин эди. Аввалига Темур Ҳакимов, кейинроқ Абдулазиз Юсупов қулай имкониятлар фойдалана олмади. 

Даврон Файзиев томонидан захирадан майдонга туширилган Акмал Абдураҳмонов учрашувнинг 79-дақиқасида «Сўғдиёна»га ғалаба келтирувчи гол муаллифига айланди. Натижада 2:1 ҳисобида ғалаба қозонган жиззахликлар Олий лигадаги иштирокини давом эттирадиган бўлди. 

Эслатиб ўтамиз, бунгача Тошкентнинг «Обод» жамоаси лига йўлланмасини қўлга киритган, Самарқанднинг «Динамо» клуби эса Олий лига сўнгги ўринни эгаллаб биринчи лигага равона бўлганди.

«ОҚ-ТЕПА» – «СЎҒДИЁНА» 1:2 (0:1)

Голлар: Темур Ҳакимов (53) — Санжар Рашидов (29), Акмал Абдураҳмонов (79).

manba kun.uz