Сурия курдлари мамлакатдаги тинчлик таъминланиши йўлида Россия билан ҳамкорлик қилишга тайёрлигини билдирди. Суриядаги "Демократик иттифоқ" партияси етакчиси Солиҳ Муслим Муҳаммад Sputnik нашрига берган интервьюсида шу ҳақда маълум қилган.

"Шу вақтгача бизда Россия билан фаол ҳамкорликни йўлга қўйишга имкон бўлмай келмоқда. Лекин биз бундай имконият пайдо бўлса, жуда хурсанд бўламиз. Россия шу вақтгача бизнинг ҳудудга бунчалик яқинлашмаганди. Улар асосан Ғарбда ҳаракатланишмоқда эди. Ўйлайманки, келажакда биз Россия билан ҳарбий ҳамкорликни йўлга қўямиз", деган Солиҳ Муслим Муҳаммад.

Маълумот учун, курдлар Сурия низоларининг бир қисми бўлиб, бу томон ИШИДнинг ашаддий душмани ҳисобланади ва Суриядан ажралиб, шимолда алоҳида давлат тузиш учун ҳаракат қилишади. Шу билан биргаликда Туркия ҳудудида яшайдиган курдлар Курдистон ишчилар партияси атрофида бирлашган ва бу партия Туркия ҳукумати билан душман. Айнан шу партия томонидан шу йилнинг 20 июлида Туркия шарқидаги Суруч шаҳрида теракт амалга оширилгач, (32 киши қурбон бўлган) Туркия ҳукумати ичкаридаги курдларни асоратга солиб, Сурия ҳудудидаги курдларга қарши ҳаводан зарбалар беришни бошлади.

Россия ва Туркия ўртасидаги муносабатлар 24 ноябрь куни Сурия ва Туркия чегарасида Су-24 русумли ҳарбий бомбардимончи самолёт уриб туширилганидан кейин ёмонлашди. Уриб туширилган самолётнинг учувчиларидан бири ҳалок бўлган, иккинчиси Сурия армияси томонидан қутқарилган.

31 сентябрь куни Россия ИШИДга қарши амалиётлар ўтказиш учун Сурия ҳудудига кирганди. 5 октябрь куни Сурия курдлари Россияни қўллаб-қувватлашини билдирган.