Тожикистоннинг статистика агентлиги раҳбарияти Россия миграция хизматининг Россиядаги тожикистонликлар борасидаги статистик маълумотлари аниқлигига шубҳа билдирмоқда.

“Биз Россия статистикаси бўйича маълумотларни аниқлаштирдик. Россияга бирор фуқаро келиб, уч ойдан кейин кетиб ва кейин Россияга ўша миграция карточкалари билан келса ҳам бир неча кишига ҳисобланади”, деб айтмоқда Тожикистон президенти ҳузуридаги Статистика агентлиги директори Гулнора Ҳасанзода.

Ҳасанзоданинг фикрича, Россия ҳудудида Россия расмий маълумотларида келтирилганчалик кўп тожик мавжуд эмас. “Бу ҳақиқатга мос келмайдиган рақамлар”, деб айтди Ҳасанзода.

Россия Федерал миграция хизмати маълумотларига кўра, 2015 йил 5 ноябрига кўра Россияда 935 минг тожикистонлик бўлган.

Йил бошига нисбатан Россиядаги тожикистонликлар сони 64 мингга камайган. Йил бошида уларнинг сони 999 мингдан кўпроқни ташкил қилган.

Бу орада Тожикистон меҳнат, миграция ва аҳолининг бандлиги вазирлиги миграция хизмати маълумотларига кўра, жорий йилнинг 8 ойида Тожикистондан 430 минг одам меҳнат миграцияси билан чиқиб кетган. Бу кўрсаткич 2014 йилнинг шу даврига нисбатан 28 минг 676 киши ёки 9,3 фоизга камроқни ташкил қилади.

“Меҳнат миграцияси даражасининг камайиши Россияга 2015 йил 1 январдан хорижий паспортлар билан кириш ва Россия томонидан хорижий давлатлар меҳнат муҳожирлари фаолиятига тегишли амалдаги қонунчиликка ўзгартиришлар киритилиши билан боғлиқ” деб айтилмоқда Тожикистон миграция агентлигида.