Россия Суриядаги "Хмеймим" авиабазасига 10-12та қирувчи самолёт билан таъминлаши кутилмоқда. «Коммерсантъ» нашрининг ҳарбий доиралардаги манбасига асосланиб, хабар тарқатишича, Россия қуролли кучлари бош штаби Су-24 самолётининг уриб туширилишидан тегишли хулосалар қилди ва Суриядаги 24та бомбардимончи самолётнинг ҳар бири кузатувчи самолётлар билан таъминланади.

Манбанинг ёзишича, бунгача Россия самолётларига Суриядаги жангариларнинг ердан туриб хавф солиш имконияти бўлмагани туфайли бомбардимончи самолётларнинг хавфсизлиги учун уларга кузатувчилар бириктирилмаганди. Россия АҚШ бошчилигидаги коалиция томонидан эса зарба кутмаганди.

Туркия қирувчи самолёти Су-24 самолётини уриб туширганидан сўнг, Россия Мудофаа вазирлиги "Хмеймим"даги авиабазасини 10тадан 12тагача янги самолётлар билан таъминлашни режалаштирмоқда. Айни вақтда бу авиабазада Россиянинг жами 34та ҳарбий самолёти бор. Шундан 24таси Су-24М ва Су-34 ҳисобланади. Энди уларнинг ҳар бири Су-27СМ ва Су-30СМ билан биргаликда ҳарбий амалиётлар ўтказади.

Бироз олдинроқ, Россия президенти Владимир Путин Суриядаги базани С-400 ракетадан мудофаа мажмуалари билан таъминлаш режасига розилигини билдирганди.

Эслатиб ўтамиз, 24 ноябрь куни тонгда Туркия—Сурия чегарасида Суриядаги ҳарбий операцияда иштирок этаётган Россиянинг Су-24 самолёти уриб туширилди. Туркиянинг таъкидлашича, самолёт мамлакат ҳаво кенгликларини бузиб ўтган.

Россия Мудофаа вазирлигининг қайд этишича, Россия самолёти Туркия ҳудудига кирмаган.

Россия президенти Владимир Путин буни "орқадан зарба бериш" деб баҳолаган.