Американинг Балтимор шаҳри аэропортида полиция тўрт йўловчини бортдаги қўшни йўловчи аёл улардан бири телефон орқали суҳбатда “динамит” сўзини ишлатгани ҳақида хабар берганидан сўнг рейсдан чиқариб юборди, дея хабар бермоқда The Mail.

Ҳодиса 17 ноябрда – Париждаги терактлардан бир неча кун ўтганидан сўнг Чикагога йўл олган Spirit Airlines самолётида бўлиб ўтган. Бу пайтда лайнер учиш-қўниш йўлагидан жой олиб улгурган эди.
Йўловчилардан бири экипаж аъзоларига юзланиб, у билан бирга кетаётганлар бир неча марта қўнғироқ қилгани ва “инглизчада гаплашмаганини” айтган. У суҳбатдаги BLR ва Dynamite (BLR — Ҳиндистоннинг Бангалор шаҳри халқаро аэропортининг коди) сўзларини пайқаб қолган.

Самолёт капитани терминалга қайтишга қарор қилган, шубҳа остидаги йўловчи ва унинг уч ҳамроҳи сўроқ қилиниб, сўнгра ҳеч қандай айбловларсиз қўйиб юборилган. “Унинг телефонидан бундай хабар топилмади”, - деди Мэриленд транспорт полицияси бошқармаси вакили Жонатан Грин.