Австралия жанубидаги Аделаида шаҳри ҳудудида кузатилган ўрмон ёнғинлари натижасида икки киши ҳаётдан кўз юмди, яна бир неча киши жароҳатланди, дея хабар бермоқда Associated Press маҳаллий ҳукумат маълумотига асосланган ҳолда.

Уларнинг сўзларига кўра, ёнғинлар бир неча хонадонларни бағрига олиб улгурди, ҳозирча вазият назоратдан чиққан ҳолатда. Жанубий Австралия штати бош вазири Жей Уэзерил учинчи қурбон бўлган киши ҳақида ҳам тасдиқланмаган маълумотлар борлигини маълум қилди.
Ёнғин қамраб олган ҳудуднинг умумий майдони 85 минг гектарни ўз ичига олади. Жабрланганлар орасида ёнғин хавфсизлиги ходимлари ҳам бор.

Қайд этилишича, қишлоқ хўжалиги майдонлари ва ўрмон ҳудудлари хавф остида қолмоқда. Шу билан бирга, штат маркази Аделаида шаҳрига ҳам ёнғинлар чанг солаяпти.
Штат бош вазири сўзларига кўра, жабрланганларнинг умумий сони 13 нафарга етган бўлиб, уларнинг икки нафари ўт ўчириш ходимидир.

Жабр кўрганларнинг барчаси маҳаллий шифохоналарга етказилган.
Айни пайтда фавқулодда ҳолат хизматлари ўт билан курашни давом эттирмоқда — 300дан зиёд ёнғин хавфсизлиги ходимлари 40 километр ҳудудда оловга қарши чиқмоқда.