Испания бош вазири Мариано Рахой Соре радиостанциясида бўлган спорт дастурининг тўғридан тўғри эфир вақтида ўғлига адабини бериб қўйди. El Pais берган маълумотга кўра, бу ҳолат ҳукумат бошлиғи спорт шарҳловчиси Пако Гонсалес билан бирга “Шахтёр” ва “Реал” ўртасидаги учрашувни шарҳлаш пайтида бўлган.

Бош вазир эфирга ўзининг ўн ёшли ўғли Хуанни олиб олди. Дастур давомида Гонсалес ўғлидан мамлакатдаги энг машҳур спорт шарҳловчиси, FIFA EA видеоўйинига овоз берган Манола Лама ҳақида унинг фикрини сўраган.

“Уни бемалол дабдала деб айтса бўлади”, — деб жавоб берган Хуан. Натижада унинг жавоби студиядагиларнинг, жумладан, отасининг кулгисига сабаб бўлган. Кулгисини яшира олмаган Рахой ўғлининг боши орқасига икки марта енгилгина тарсаки туширишга ҳам улгарган.