Тошкентдан Туркияга фоҳишалик учун олиб кетилаётган қиз “Қоплонбек” чегара-постидан ўтиш чоғида қўшмачи аёлни ҳуқуқ-тартибот органларига ушлаб берди. Бу ҳақда “Ҳуқуқ” нашри ёзмоқда.

Айтилишича, Камола Ғайратова Юлдуз ва Екатерина исмли қизлар билан ресторанда танишиб қолган. У қизларга Туркияда официантлик ишини ҳамда 500 доллар маошни ваъда қилган.

Аммо улар чегара постига етганида бўлиб қолган кўнғироққа жавоб бераркан, Ғайратова рус тилида қизларнинг нархи борасида талаша бошлаган. Унинг сўзларини Екатерина тушуниб қолган.

Чегарадан ўтишда декларация тўлдириш пайтида Екатерина шу ерда хизмат қилаётган ҳуқуқ-тартибот ходимларидан бирига бўлган воқеаларни айтиб берган. Натижада қўшмачи аёл қўлга олинган.

Жиноят ишлари бўйича Чилонзор туман судининг ҳукми билан Камола Ғайратовага 8 йил муддатга озодликдан маҳрум қилиш жазоси тайинланди.