Вьетнамнинг Намдин провинцияси ҳудудида энг семиз мушук номига номзод бўлган жонзот борлиги аниқланди. Мазкур Миу лақабли мушукнинг оғирлиги деярли 20 килограммни ташкил этиши айтилмоқда, деб ёзади Daily Mail.

Мушукнинг хўжайини 75 ёшли Чан Тхи Нга ҳисобланади. У Миуни 10 йил муқаддам сотиб олган. Миу бошқалардан овқат истеъмол қилишдаги ажабланарли қобилияти билан ажралиб туради. Эгасининг сўзларига кўра, мушук жуда тез ўсган. «Бир ой ўтиб у деярли бир килограмм вазнга эга бўлганди», – дейди Чан Тхи Нга.

Мушук маҳаллий аҳоли ўртасида жуда машҳур бўлган. Мазкур уй ҳайвонини сотиб олиш таклифи билан бир неча маротаба чиқилганига қарамай бека уни сотишдан бош тортган.

«У мени дўстим ёки ўғлимдек, неварамдек бўлиб қолган», – дея тасдиқлайди Вьетнам фуқароси. 

Ҳозирги кундаги рекорд немис мушуги Элвисга тегишли. Элвиснинг вазни 17,5 кгни ташкил қилади. Агар Миунинг вазни расмий равишда тасдиқланса у дунёдаги энг семиз мушук номини қўлга киритади, деб ёзади Daily Mail.