Смартфонлар учун мўлжалланган браузерлар бозори етакчиларининг учлигида ўзгаришлар қайд этилди. Stat Counter ҳисоблагичлари маълумотларига кўра, октябрь ойида Хитойдаги Alibaba компаниясининг шўъбаси томонидан ишлаб чиқилган UC Browser браузери Apple Safari`дан ўзиб кетди ва Chrome`дан кейинги иккинчи ўринни қўлга киритди.

Ҳисоблагич маълумотларига кўра, 35,84 фоиз смартфон фойдаланувчилари октябрь ойида тармоққа Google Chrome браузери орқали киришган. 17,42 фоизи эса бунинг учун UC Browser`дан, 16,38 фоиз – Apple Safari, 13,06 фоиз –Android штатли браузери (Google мобиль операцион системасининг эскирган намуналарига ўрнатилган) ва 12,54 фоизи – Opera браузерларидан биридан фойдаланишган.

Агарда фақатгина смартфонлар эмас, балки барча мобил қурилмалар, жумладан, iOS ва Android платфордаги планшетлар ҳам ҳисобга олинса, кўрсаткичлар ўзгачароқ тус олади: 33,8 фоиз Chrome, 21,43 фоиз Safari ва 15,57 фоиз UC Browser`да. Бу планшетлар бозорида iOS-қурилмалар улушининг смартфонлардагига қараганда кўпроқ экани билан боғлиқ.

UCWeb компанияси энг кўп интернет фойдаланувчиларга эга Хитой, Ҳиндистон ва Индонезияда ўз браузери билан етакчилик қилмоқда.