Тожикистон собиқ мудофаа вазири ўринбосари Абдуҳалим Назарзода бошчилигида мамлакат ҳудудида қуролли исён кўтаришда иштирок этгани гумон қилинаётган Тожикистон фуқароси Россиянинг Челябинск вилоятида қўлга олинди. Бу ҳақда ТАСС маҳаллиф Федерал хавфсизлик хизмати матбуот хизмати маълумотларига таяниб хабар бермоқда.

«Ҳибсга олинган шахс Тожикистон ҳудудида, собиқ мудофаа вазири ўринбосари Абдуҳалим Назарзода бошчилигида мамлакат ҳудудида қуролли исён кўтаришда иштирок этгани гумон қилинмоқда. Шунингдек у Тожикистон ҳуқуқни муҳофаза қилиш органлари томонидан террорчилик ҳаракатларини амалга оширишда айбланиб қидирувда бўлиб келган», - дейилади ташкилот хабарида.

Жиноятчини қўлга киритиш жараёнида ФХХ ходимлари полиция ва прокуратура органи вакиллари иштирок этишган.

«34 ёшли Тожикистон фуқароси вақтинча яшаб турган Сатка шаҳарчасидаги уйда қўлга олинди. Жараён давомида экстремистик руҳдаги адабиётлар ҳам топилди», - қўшимча қилади ташкилот.

Манбага кўра, жиноятчини Тожикистонга қайтариб юбориш бўйича масала тез кунда ҳал қилинади. 

Маълумот учун, 2015 йилнинг 4 сентябрь куни собиқ мудофаа вазирининг ўринбосари Абдуҳалим Назарзода бошчилигида бир қатор жангарилар мамлакат ҳудудида қуролли исён кўтаришганди.

Аксилтеррор операциялари чоғида 30 нафар жиноятчилар йўқ қилинган, 130 нафар шубҳа остидаги жангарилар қўлга олинганди. Назарзоданинг ўзи отишмалар жараёнида вафот этганди.