Франция Сурия армияси муҳолифат билан ИШИДга қарши курашиши мумкинлигини айтиб, Сурия президенти Башар Асадга нисбатан ўз муносабатини юмшатганини билдирмоқда. Бу ҳақда Financial Times газетаси ёзмоқда.

Франция ташқи ишлар вазири Лоран Фабиус айни пайтда ғарб давлатлари учун Раққа шаҳрини жангарилардан қайтариб олиш устувор вазифа ҳисобланишини айтди. Бунинг учун мувофиқлаштирилган, жумладан Сурия армияси томонидан ҳужум талаб қилинади.

“Икки хил чора: бомбардимонлар ва ўз ичига Сурия озод армиясини ҳам, ҳукумат армиясини ҳам олувчи жойларда қўшинлар талаб этилади. Нима учун йўқ?», деб айтди Фабиус.

Мақола муаллифи фикрича, бундай фикрлар аввал Асадни “қувғин”дек қабул қилган Франция Сурия президентига нисбатан ўз фикрини ўзгартиргани ва Россия билан ҳамкорлик қилишни бошлаб, устувор вазифаларини ўзгартирганини билдиради. Шу билан бирга Фабиуснинг фикрича, агар Сурияда ҳаққоний сайловлар ўтса, Асадда президент лавозимига қайта сайланишга ҳеч қандай имконият бўлмайди.

Аввалроқ Франция президенти Франсуа Олланд Владимир Путин билан учрашув натижаларига кўра берган матбуот-анжуманида Башар Асад Сурия келажагида ҳеч қандай роль ўйнай олмаслигини айтган эди.