Америкалик олимлар спиртни ёруғлик ёрдамида дистиллаш усулини кашф қилишди. У қиздириш ёрдамида дистиллашдан кўра камроқ энергия талаб қилади ва кучлироқ, 99 фоизли спирт беради. Бу ҳақдага мақола ACS Nano журналида чоп этилди.

Райс университети вакиласи Наоми Хэлас этил спирти ва сув аралашмасига олтин ва кремний оксидидан бўлган наномоддалар қўшиб, суспензияга лазер нурларини қаратди. Нур наномоддаларга текканида фотонлар уларни ютади, шундан сўнг ҳарорат ошади. Натижада ёруғлик эритманинг юзасидан ушланади, қизиш оқибатида эса аралашмадан этил спирти ажралиб чиқади.

“Охирги ўн минг йил давомида одамлар сувни нотўғри равишда тубидан қиздириб келишган. Биз бу ишни тепадан қиламиз: янги усул энергия самардорлигини таъминлайди, негаки суюқликнинг бутун ҳажмини қиздиришни талаб қилмайди”, - дейди тадқиқотчи.

Спиртни оптик дистиллаш эски бир муаммони четлаб ўтишга ёрдам беради: алкоголнинг максимал концентрациясини 95 фоиз билан чеклайдиган азеотроп аралашманинг ҳосил бўлиши.