Германияда жами 250 минг киши қонуний асоссиз яшамоқда ва полиция уларни қидириб топиш имкониятига эга эмас. Бу ҳақда бугун Германия полиция касаба уюшмаси раҳбари Райнер Вендт баёнот берди.

“Айни пайтда айнан шу миқдордаги одамлар Германияда ноқонуний асосда бўлиб келмоқда. Биз уларни қидирмаймиз. Полицияда бу қидирувларни олиб боришга имконият ва ресурслар йўқ. Бу умуман полициянинг вазифаси эмас”, - деди у.

Илгарироқ Германия матбуоти 200-300 минг муҳожир чегарадан ўтиш чоғида рўйхатларга киритилиб, шундан кейин миграцион хизматга мурожаат қилмаслигини, бунинг оқибатида мамлакатда ноқонуний муҳожирлар сонининг ошиб кетаётганини маълум қилган эди.