Хосеп Гвардиола жорий мавсум якунлангач, "Бавария"ни тарк этади ва Англия премьер лигасига йўл олади. Бу ҳақда Cadena COPE радиосида хабар берилган.

Манбанинг айтишича, мутахассис ёзда "Манчестер Сити"нинг янги бош мураббийи сифатида ишлай бошлайди.

Қайд этилишича, "Бавария" раҳбарияти янги бош мураббий излашни бошлаган. Бу ўрин учун асосий номзод Карло Анчелотти ҳисобланади.

Ўтган ойда "Бавария" клуби раҳбарияти Гвардиолага ультиматум қўйганди.

Унга кўра, аввалига немис клуби раҳбарияти испаниялик мутахассисга охирги қарорини айтиши учун 31 декабргача рухсат берганди. Бироқ бу муддат энди қисқартирилди. Натижада Гвардиола бу борада сўнгги қарорини 27 ноябргача айтиши керак бўларди.

Гвардиола клубдаги келажаги ҳақида берилган саволга, «ўзининг иши унга ёқишини, келажаги борасида ҳали жавоб беришга эрта экани» ҳақида ноаниқ жавоблар бериб келаётган эди.

Бундан олдин ҳам, Хосеп Гвардиола 2016 йил ёзидан Англиянинг «Манчестер Сити» клубини бошқариши ҳақида хабарлар тарқатилганди.

Маълумот учун, август ойида «Манчестер Сити» Мануэл Пеллегрини билан 2017 йилга қадар мўлжалланган янги шартнома имзолаганди.