Қозоғистоннинг Актобе вилоятида кўп болали ёлғиз она ўз фарзандларини ётоқхонанинг саккиз квадрат метрли омборхонасида яшамоқда. Икки фарзанди эса оғир касал, дея хабар бермоқда КТК.

Мазкур митти хонада Гулмира Шабдарова беш болани вояга етказмоқда. Энг кичиги – уч ёшли ўғли – ногиронлик нафақасини олиши лозим. Ҳозирда ҳужжатлар расмийлаштирилмоқда. Унинг психологик ўсишида муаммолар бор. Катта қизи эса эпилепсия билан касалланган. Болалар доимий парваришга муҳтож.

Бироқ Гулмира фарзандларидаги етишмовчиликлар эмас, кўпроқ кўчада қолишдан қўрқади. Улар яшаётган уй муқаддам ётоқхонанинг омборхонаси бўлган. Амалдорлар уларни бу ерга вақтинчаликка жойлаштиришган. Ҳар сафар эшик тақиллаганида аёд хавотирга тушади: ишқилиб ҳокимиятдан бўлишмасин...

“Мен уй сўрамайман. Фақатгина шу хонани номимга расмийлаштиришса кифоя, бошқа ҳеч нарса керак эмас”, - дея йиғлайди Гулмира.

Гулмиранинг собиқ турмуш ўртоғи аллақачон унга ёрдам бермай қўйган. Кичик фарзандининг касаллиги тўғрисида хабардор бўлганидан сўнг оиласини ташлаб кетди.

Ҳокимиятдагилар эса унга қўлдан келганча ёрдам қилишга ваъда беришган: фарзандларининг ҳужжатларини расмийлаштиришди, уларга ижтимоий нафақа тўлашмоқда. Доимий яшаш жойи масаласи эса суд орқали ҳал этилади.