Қоғозистон Республикаси Маданият ва спорт вазирлиги вакили Фуат Рахмитовнинг айтишича, қозоғистонлик ижтимоий тармоқ фойдаланувчилари айрим хатти-ҳаракатлари учун жазога тортилиши мумкин.

“Айрим ижтимоий тармоқ фойдаланувчилари қонунчилик талабларини билмаган ҳолда қатл ва бошқа саҳналар тасвирланган видеоматериалларни тарқатишмоқда. Биз бу борада жавобгарликка тортиш масаласини кўтариб чиқмоқдамиз”, - деди Рахмитов. Бу ҳақда КазТАГ хабар қилди.

“Фойдаланувчиларга ижтимоий тармоқ орқали бундай турдаги маълумотларни ихтиёрий равишда ўчириб олишлари учун вақт берилади. Агарда кимдир ҳаракатга тушмаса, маъмурий ёки жиноий жазога тортилиши мумкин”, - дея ойдинлик киритди у.

Рахмитов тақдим этган маълумотга кўра, мамлакатда сўнгги 11 ой ичида 900 дан зиёд сайт бўйича материаллар келиб тушиб, улар юзасидан 700 маротаба экспертиза ўтказилди. Уларнинг ярмидан кўпига диний экстремизм ташвиқоти туфайли блоклаш бўйича таклиф киритилди.