Россиянинг Самара вилоятида Федерал хавфсизлик хизмати нефть ўғрилиги билан шуғулланувчи халқаро жиноий гуруҳ фаолиятини фош қилди. РИА Новости агентлигининг ҳуқуқ-тартибот идораларига таянган ҳолда маълум қилишича, гуруҳнинг кунлик даромади 1 млн рублни ташкил қилган.

Маълум бўлишича, охирги йилларда фош этилган энг йирик гуруҳ нефть қувурларини кесиб хом ашё ўғирлаш ва уни ноқонуний етказиб бериш билан шуғулланиб келган. Гуруҳ фаолияти қанча давом этгани, улар қандай миқдордаги ўғриликларни содир этгани номаълум.

Жиноятчиларни қўлга олиш бўйича операция 25 ноябрь куни Сизранда бўлиб ўтди. Унда Самара ва Пенза вилоятлари ҳуқуқ-тартибот органларининг 100 нафар вакили иштирок этди.