Австралиялик мутахассис Мирко Йеличич Тошкентнинг "Локомотив" жамоасиг бош мураббий сифатида тайинланди. Бу ҳақда жамоа расмий сайтида хабар берилган.

"Жорий мавсум якунига етганидан сўнг “Локомотив” футбол клуби раҳбарияти жамоамиз мураббийлар штабида фаолият юритиб келган Мирко Йеличични расман бош мураббий этиб тайинлади. Австралиялик мутахассис жамоани бўлажак ўйинларга тайёрлайди ва клуб натижалари натижа учун эндиликда у жавобгар бўлади.

Мирко Йеличич бунгача асосий таркиб мураббийлар штабида ишлаб келаётганди. Эндиликда янги футболчилар унинг қарорига кўра танлаб олинади. Йеличичга мураббийлар штабида Андрей Микляев ёрдам беради. Дарвозабонлар билан эса одатдагидек Пётр Гизимчук ишлайди.

Мавсум якунлангач, кўпчилик “Локомотив”га энди ким бош мураббий бўларкин дея қизиқиб кўрган, ҳатто бу борада баъзи номзодлар номи ҳам илгари сурилганди. Бироқ клубимиз раҳбарияти Мирко Йеличига ишонч билдиришини таъкидлади.

Серб миллатига мансуб мутахассис айни пайтда уйида дам олмоқда. Унинг 9 декабрь куни Тошкентга қайтиб келиши кутилмоқда", дейилади хабарда.

Эслатиб ўтамиз, 17 октябрь куни Олий Лига якунига ҳали 5 тур қолганида "Локомотив" Вадим Абрамовни жамоа бош мураббийлигидан бўшатганди. Бунга жамоанинг чемпионатда қайд этаётгани натижалари раҳбариятни қониқтирмагани сабаб бўлди.

Жамоа ўтган ҳафтада якунланган Олий Лига биринчилигида 74 очко билан иккинчи ўринда қолди. Биринчи ўринда эса 75 очко тўплаган "Пахтакор" жамоаси ўрин эгаллади.