Туркия ўз ҳудудидан суриялик қочқинларни чиқариб юбориб, халқаро инсонпарварлик ҳуқуқини бузмоқда. Бу ҳақда Лондонда жойлашган Amnesty International ҳуқуқни ҳимоя қилиш ташилоти хабар берди.

Ушбу ташкилот ходимларининг айтишича. турк ҳукумати аввал Эрзурум шаҳрида уруш бўлаётган давлатлар фуқароларини ушлаб туришга мўлжалланган марказда сақланган 80 нафар суриялик қочқинни уларнинг ҳаётини хавф остига қўйиб ва шу тариқа ҳалқаро ҳуқуқни бузиб, Туркиядан чиқариб юборган, деб келтирмоқда Amnesty International’нинг хулосасини The Guardian нашри.

Бунга қарамасдан, Туркия бош вазири Ахмет Довудўғлу 29 ноябрда Брюсселда Европа Иттифоқининг миграция муаммосига бағишланган махсус саммитида иштирок этмоқчи. Бу саммитда Европа етакчилари Анқара билан Европа Иттифоқи давлатларига Туркия орқали қочқинлар келишини тўхтатишга имкон берувчи келишувни тузишни режалаштиришмоқда.
“Қочқинлар Туркияда борган сари асоссиз ушланиш ва Сурияга мажбуран жўнатилишга учрамоқдалар, чунки Туркия ҳукумати Европа Иттифоқи билан фойдали битимни тузиш учун хавфли ҳисобланган одамларни жазоламоқда”, деб айтмоқда Amnesty International’нинг Туркияга жавоб берувчи ходими Эндрю Гарднер.

Amnesty International, шунингдек, уруш бўлаётган давлатлар фуқароларини ушлаб туришга мўлжалланган марказда суриялик қочқинларнинг калтакланиши ҳолатларини қайд қилди. Ташкилот маълумотларига кўра, зўравонликка учраган одамлар ўз истаги билан депортация қилиниши ҳақидаги ҳужжатларни имзолашга мажбурланган. “Баъзи одамлар бизларга улар ҳужжатлар турк тилида тузилгани учун қандай ҳужжатларни имзолаётганларини билмаганликларини айтганлар. Бошқалар эса ҳужжатларга имзо қўймагунларича хоналарга қамаб қўйилганларини айтишди. Баъзи ҳолларда турк зобитлари куч билан том маънода уларни қўлидан ушлаб, ҳужжатларни имзолатишган”, деб қўшимча қилди Гарднер.

Ҳуқуқни ҳимоя қилиш ташкилоти Туркияда суриялик қочқинларга ҳеч қандай ҳуқуқий кўмак берилмаётганини айтди. Айни пайтда Туркияда Яқин Шарқ давлатларидан 2,2 млн қочқин бор.