АҚШнинг Колорадо штатида жойлашган Колорадо-Спрингс шаҳрида 27 ноябрда оилани режалаштириш тиббиёт марказида бир эркак томонидан содир этилган отишма оқибатида 3 киши ҳалок бўлди. Бу ҳақда журналистларга маҳаллий ҳокимият вакиллари маълум қилишди.

Уларнинг маълумотларига кўра, бир нафар полициячи ва икки фуқаро ҳалок бўлган. Охирги маълумотга кўра, шифохоналарда отишмадан жабрланган 9 киши, жумладан 4 нафар полициячи қолмоқда.

Отишмани содир этган эркак қўлга олинган. Ҳуқуқ-тартибот муассасалари ходимлари уни таслим бўлишга кўндира олишган.

Айни пайтда сапёрлар гуруҳи марказ биносини жиноятчи бомба қўйган бўлиши мумкинлигига текширишмоқда.

Воқеа автомобиль йўли ёқасида, аҳоли пунктидан 600 метр узоқликда жойлашган тиббиёт марказида юз берган.

Аввалроқ Оқ уй вакили АҚШ президенти Барак Обама ушбу воқеадан хабардор этилганини маълум қилган. “Президент Колорадодаги воқеадан ўзининг террорчиликка қарши кураш масалалари бўйича ёрдамчиси Лиза Монако томонидан хабардор этилган. Президент заруратга кўра янги маълумотлар олади”, деб айтди Оқ уй вакили.