“Челси” клубининг бош мураббийи Жозе Моуринью “аристократларнинг” собиқ ҳужумчиси, ҳозирда “Монреаль Импэкт” клуби учун тўп сураётган Дидье Дрогбанинг яқинда айтган сўзларига изоҳ берди. Ўзининг савдога чиққан автобиографик китобини тарғиб қилаётган Дрогба интервьюларидан бирида аввал “Челси”да шахсиятлар етарли бўлгани, ҳозирда эса улардан фақатгина Жон Терригина қолганини айтган.

“Сиз китобни сотиш учунгина нимадир десангиз, мен бу сўзларни ўқимайман. Мен Дидье каби зўр йигитларнинг интервьюларини яхши кўраман. Бироқ у сўзлар интервью пайтида айтилмаган, чунки мен уни интервью дея олмайман. Бу интервью эмас, балки китобни яхшироқ сотиш истагидир. Бироқ бу менинг ҳафсалимни пир қилмади, чунки биз шундай дунёда яшамоқдамиз. Дрогбанинг интервьюси ҳақида мамнуният билан гаплашишим мумкин, бироқ, узр, унинг китоби сотилиши ҳақида эмас”, деб айтди Моуринью.