Россиянинг Lada Vesta машинаси Ўзбекистонда илгари мўлжалланганидан 3-4 минг доллар арзонроққа сотиладиган бўлди. Lada Uzbekistan дилерлик марказига таяниб хабар бераётган Review.uz сайтининг ёзишича, машинанинг топ комплектацияси нархи 12 минг долларни ташкил қилади.

Россиянинг “АвтоВАЗ” автогигантига тегишли “Х” силсиласидаги янги седан Ўзбекистон ҳудудида энг эрта кейинги йилнинг март ойида сотувга чиқарилади. Унга қадар бир қанча қўшимча ишланмаларни амалга ошириш ҳамда экспортга модернизация қилинган маҳсулот чиқариш режалаштирилмоқда. Эски хабарга кўра, Vesta Ўзбекистонда 2015 йилнинг сентябридан сотувга чиқарилиши кўзда тутилган эди.

Ўзбекистонга “Комфорт”, “Оптима” ва “Люкс” комплектациясидаги автомобиллар сотилади. Модель “Евро-5” экологик хавфсизлик индексига эга.

Янги автомобиль 1.6 л ли 106 от кучига эга двигатель ва роботлаштирилган ўтказмалар қутиси билан таъминланади. Ёқилғи сарфи – 7 л/100 км.

2016 йил бошига келиб 1.8 л ли двигателга эга модификация ҳам сотувга келиши мумкинлиги тахмин қилинмоқда.