Сурияда ҳалок бўлган россиялик учувчи Олег Пешковнинг танаси 29 ноябрь куни Туркиядаги Россия дипломатларига топширилади. Бу ҳақда Россиянинг Анқарадаги элчихонаси пресс-атташеси Игорь Митяков маълумот берди.

“Бугун Хатай вилоятидан Анқарага РФ қаҳрамони Олег Анатольевич Пешковнинг танаси олиб келинганини маълум қилишди. Парвозда уни элчихонанинг ҳарбий атташеси кузатиб боради. Анқара аэродромида самолётни РФ элчиси Андрей Карлов ҳамда элчихона намояндалари кутиб олади. Россияга учувчининг танаси қачон етказилиши борасида аниқ маълумот йўқ”, - унинг сўзларини келтиради ТАСС агентлиги.

Илгарироқ Туркия бош вазири Аҳмат Довудўғли россиялик учувчининг танаси туркманлар қўлидан олинганини, яқинда россиялик дипломатларга етказилишини маълум қилган эди. Шу кеча Хатайда барча зарурий диний маросимлар ўтказилган.

Олег Пешков Туркия ҳарбий кучлари томонидан уриб туширилган Су-24 самолётининг учувчиси эди. Самолёт ракетага учганида у катапульта тугмасини босиб улгурган бўлса ҳам, парашютда ҳаводан тушаётганида қуролли туркман гуруҳлари томонидан отиб ташланди.