Эрон ҳукумати 28-29 ноябрда 50 та нефть ва газ конини ўзлаштириш бўйича умумий қиймати 30 млрд долларлик шартномалар тузишга тайёрланмоқда, деб хабар бермоқда Bloomberg агентлиги. Эрон нефть-газ мажмуасига энг йирик инвесторлардан бири Россиянинг “Лукойл” компанияси бўлиши кутилмоқда.

“Кўплаб Европа ва Осиё компаниялари қизиқиш билдирмоқда”, деб айтди Эрон нефть вазири Бижон Номдор Зонгоний. Зонгонийнинг айтишича, гап жумладан “Лукойл”, Total, Royal Dutch Shell ва Eni каби компаниялар ҳақида кетмоқда. “Лукойл”да ушбу хабарга изоҳ беришмади, деб хабар бермоқда Rambler News Service агентлиги.

Total компаниясининг Яқин Шарқдаги разведка ва қазиб олиш бўйича бошлиғи Стефан Мишель компания санкциялар олинса ва шартномалар мақбул бўлса Эронга қайтишдан манфаатдор бўлишини айтди. “Биз бу давлатда узоқ вақт ишлаганмиз, шунинг учун биз аввал ишлаган баъзи конлар билан танишмиз”, деб айтди Мишель.