Россиядан Понт греклари геноцидин тан олиш сўралмоқда. Бу борадаги петиция Change.org фуқаролик ташаббуслари порталида чоп этилди. Ташаббускорлар сифатида Греция жамоатчилиги ҳамда Россия греклари кўрсатилди.

“1914-1923 йилларда Туркия ҳукумати Понт ҳудудида қадимдан истиқомат қилиб келган 326-382 минг грекни қасддан йўқ қилди. Юз йилдан буён бегуноҳ қурбонларнинг жонлари адолатга чақириқ бўлиб хизматлар қилмоқда. Ўша фожиали йилларда юз минглаб грекларга бошпана бўлган Россиядан бегуноҳ қурбонлар хотирасини ёдга олишни сўраймиз”, - дейилади хабарда.

1994 йил февралидан буён Греция ҳукумати 1914-1923 йилларда Усмонлилар салтанати, ундан кейин эса Ёш турклар ҳамда Отатуркчилар томонидан, арманилар ва оссурияликлар билан бир қаторда, Понт греклари ҳам қирғин қилинганини даъво қилиб келади. 1919 йил 19 майида Мустафо Камолнинг қўшинлари Самсунга туширилиши муносабати билан бошланган Қутилиш уруши Туркия республикасининг ташкил топиши билан якун топди. Туркияда бу сана ёшлар ва спорт куни сифатида нишонланади. Лекин Греция айнан шу санани греклар геноцидининг бошланиши деб ҳисоблайди.

Айни кунда ушбу воқеаларнинг геноцид бўлганини Грециянинг ўзи, Арманистон, Кипр, Швеция, шунингдек, дунёнинг турли чеккаларидаги грек ва армани диаспоралари тан олади.