Британиялик боксчи Тайсон Фьюри украиналик жаҳон чемпиони Владимир Кличкони мағлуб этди ва IBF, IBO, WBO ва WBA версиялари бўйича жаҳон чемпиони унвонларини қўлга киритди. 29 ноябрда Дюссельдорфда бўлиб ўтган жанг британиялик спортчининг очколар устунлиги билан якунланди.

12 раунд давом этган жанг натижаларига кўра барча ҳакамлар бир овоздан устунликни Фьюрига беришди. Жангда 115-112, 115-112, 116-111 ҳисоби қайд этилди.

39 ёшли Кличко ва 27 ёшли Фьюри ўртасидаги жанг аввалроқ, яъни 24 октябрда бўлиб ўтиши керак эди, бироқ украиналик жароҳат олгани сабабли кейинга кўчирилганди.

Владимир Кличко ҳисобида энди 68 та жангда 64 та ғалаба, Фьюри ҳисобида эса 25 та жангда 25 та ғалаба бор.

Владимир Кличко охирги марта 2004 йил апрелида мағлуб бўлган эди. Ўшанда у WBO версияси бўйича вакант жаҳон чемпиони унвонини техник нокаут билан АҚШлик Лаймон Брюстерга бой берган эди.