2015 йилнинг 8 ойи давомида тиббий кўрикдан ўтказилган 456 нафар ўзбекистонлик меҳнат муҳожири ОИТС (ОИВ) касаллигига чалингани аниқланди. Бу ҳақда Ўзбекистон Республикаси ИИВ масъул ходими Улуғбек Туймабоев “Маҳалла” газетасига маълум қилган.

Унинг сўзларига кўра, ўтган давр мобайнида тиббиёт муассасалари томонидан тиббий кўрикдан ўтказилган 239 минг 437 нафар фуқародан 10 минг 324 тасида турли касалликлар аниқланган. Ноқонуний миграция оқибатида жабрланган 295 нафар фуқаро турли касалликлар сабабли ҳаётдан бевақт кўз юмган. Улар орасида 456 нафари ҳозирда инсониятни ташвишга солиб турган ОИТС (ОИВ) касалини орттирган.

У.Туймабоевнинг қўшимча қилишича, хорижга ишга борган ҳамюртларимиз ҳам бахтсиз ҳодисалардан четда эмас. Боз устига, улар ўзга юртларда сарсон ва саргардон. Қозон шаҳридаги «Адмирал» савдо комплексида содир бўлган ёнғин натижасида ноқонуний равишда ишлаш мақсадида йўл олган ҳамюртларимиздан 1965 йилда туғилган самарқандлик Шокир Ҳамидов, 1994 йилда Избоскан туманида туғилган Бегзод Йўлдошев, 1996 йилда Урганч шаҳрида туғилган Умидбек Матқурбонов ҳаётдан кўз юмди.