Афғонистондаги манбалар хабарига кўра, америкаликларнинг Chevrolet компанияси Мозори Шариф ҳудудида автомобил ишлаб чиқарувчи завод қуради.

"Афганистан сегодня" хабарига кўра, Балх вилояти расмийлари ва компания вакиллари ўртасида музокаралар ўтказилган, лекин унинг якунлари ҳақида аниқ маълумотлар йўқ.

Маҳаллий тадбиркорлардан бири Забиулла Ахтарийнинг маълум қилишича, Chevrolet компанияси делегацияси Балх вилоятининг юқори лавозимли мансабдорлари билан учрашган ва вилоят ҳудудида сармоялар киритиш учун яхши шароитлар яратиб беришни сўрашган.

Унинг қўшимча қилишича, Афғонистон ҳукумати иқтисодий ривожланиш дастурларини кўриб чиққанидан кейин Chevrolet компанияси фаолиятига рухсат берилади.

Забиулла Ахтарийнинг қайд этишича, ушбу лойиҳанинг ҳаётга татбиқ этилиши орқали юзлаб афғонистонликлар билвосита ёки бевосита иш билан таъминланишади.