Жаҳоннинг бир қанча йирик компаниялари ўз маблағи ва ҳаракатларини экологик тоза энергия манбалари технологияларини яратиш борасидаги ишланмалар йўлида бирлаштиришларини маълум қилди.

Ушбу мақсадда бирлашган тижоратчи ва бизнесменлар гуруҳ Breakthrough Energy Coalition номини олди. Иштирокчилар қаторида Facebook асосчиси Марк Цукерберг, Microsoft асосчиси Билл Гейтс, Amazon раҳбари Жефф Безос, Alibaba Group асосчиси Жек Ма, Virgin Group асосчиси Ричард Брэнсон бор.

Дастлабки босқичда гуруҳ ўз маблағларини электр ишлаб чиқариш, уни сақлаш, етказиш ва ишлаб чиқариш самарадорлигини оширишга сарфлайди. Кейинчалик улар инновацион ғояларни кенг бозорга олиб чиқа оладиган йирик инвесторларни жалб қилишни режалаштирмоқда.

Breakthrough Energy Coalition гуруҳининг асосий мақсадларидан бири глобал исишни тўхтатиш ва энг камбағал давлатларни энергия билан таъминлашдир.