Республикачилар партияси вакиллари бўлган сенаторлар Жон Маккейн ва Линдси Грэм расмий Вашингтонни Ироқдаги ҳарбийлари ҳажмини 10 минг нафарга ошириш ва Суриядаги жангариларга қарши қуруқликдаги амалиётлар учун ҳам шунча аскар жўнатишга чақирди.

Бундан ташқари, сиёсатчилар АҚШ президенти Барак Обаманинг Суриядаги ИШИД жангариларига қарши курашини танқид остига олишган. Обама шу вақтгача қуруқликдаги ҳарбий амалиётларга киришишни хато деб ҳисобламоқда.

Уларнинг қайд этишича, Париждаги терактлардан кейин самарали кураш йўлини бошлашни тезлаштириш зарурати пайдо бўлган.

Бундан ташқари, сенаторлар хабарига кўра, АҚШ Миср, Туркия ва Саудия Арабистони ҳарбийларини логистик воситалар ва разведка орқали қўллаб-қувватлашлари мумкин бўлади.

"Бу савол Ғарбдаги барча давлатларга тааллуқли. Араб давлатлари узоқ вақтгача мавжуд таҳдидни сезмай келишди. Менимча, энди улар барчасини аниқ англаб туришибди", дейди сенатор.

Маккейн ва Грэм Асаднинг кетиши Араб давлатларининг ИШИДга қарши қуруқликдаги ҳарбий ҳаракатларга кириши учун муҳим омилга айланиши ҳақида айтиб ўтишган.

Бироз олдинроқ, Обама АҚШ ИШИДни йўқ қилишни ўзининг асосий мақсади сифатида белгилаб олгани ҳақида айтганди.