Нидерландияда Украинада уриб туширилган Boeing самолёти билан боғлиқ буюмларни интернет орқали сотишни йўлга қўйган полициячи ишидан бўшатилди, деб хабар берди NL Times нашри.

Нашр маълумотларига кўра, полициячи ўз хизмат ваколатини суиистеъмол қилган ҳолда олган ушбу буюмларни Marktplaats эълонлар сайтида сотувга қўйган. Полициячи ишидан бўшатилгандан кейин ҳибсга олинди.

Маълум қилинишича, полициячи Boeing фалокатини тергов қилган қутқарувчиларга тегишли бўлган махсус кийимни ҳамда “номаълум материалнинг кичкина бўлагини” сотмоқчи бўлган.

Полиция ҳозирча нимадир сотилганини айта олмаяпти. Marktplaats вакиллари эълонни “шубҳали ва ахлоқсиз” деб топиб, уни сайтдан ўчириб ташлашган ва тергов билан ҳамкорлик қилишга тайёргарликларини билдирганлар.

Malaysia Airlines авиакомпаниясига тегишли Boeing 777 самолёти Амстердамдан Куала-Лумпурга 2014 йил 17 июлда учиб кетаётганда Украинанинг шарқида Донецк вилоятида уриб туширилган. Самолёт бортида 283 нафар йўловчи ва 15 нафар экипаж аъзоси бўлган, уларнинг барчаси ҳалок бўлган.