2013 йилда тасдиқланган “2013-2020 йилларда Ўзбекистон Республикасида телекоммуникациятехнологиялари, тармоқлари ва алоқа инфратузилмасини ривожлантириш дастури” доирасида мамлакатимиз ҳудуди бўйлаб 4100 километрдан зиёд оптик толали алоқа линиялари қурилди.

Бу ҳақда 30 ноябрь куни Ўзбекистон алоқа тарихи музейида бўлиб ўтган Ўзбекистон телекоммуникация тармоқларида кенг полосали технологияларнинг жорий қилинишига бағишланган матбуот анжуманида маълум қилинди.

Дастурга мувофиқ, 2013 йилда 2100 км, 2014 йилда 2000 км ва 2015 йилнинг шу даврига қадар эса 1843 км оптик алоқа линиялари қурилди. Умумий миқёсда эса мамлакатимиз ҳудуди бўйлаб 16 минг км.дан ошиқроқ оптик алоқа кабеллари ётқизилди. Яна 10300 километр кабеллар ётқизиш режалаштирилган. Шунингдек, мобиль кенг полосали уланишни ривожлантириш учун 2 мингдан зиёд базавий станциялар ўрнатилди.

Айни пайтда Ўзбекистоннинг 10дан зиёд телекоммуникация хизматларини кўрсатувчи операторлари кўп қаватли уйлар ва биноларда FTTx (муайян нуқтага оптик алоқа кабели – fiber to the x) архитектураси асосида оптик тола ёрдамида интернетга кенг полосали технологиясини татбиқ этмоқда.