Ўзбекистон ҳукумати яқин 5 йил ичида 40та янги мусиқа ва санъат мактаби қурилади ҳамда 58таси таъмирдан чиқарилиб, модернизация қилинади. Бу ҳақда 20 ноябрь куни Ўзбекистон президенти қарори чиқарилган.

Давлат раҳбари қарорида кўрсатилишича, 2009-2014 йиллар мобайнида республика миқёсида 278та болалар санъат ва мусиқа мактаблари замонавий ўқув жиҳозлари билан таъминланган ҳолда фойдаланишга топширилган.

Санъат ва мусиқа мактабларининг фаолиятини такомиллаштиришга қаратилган янги давлат дастурига кўра, 2016 йилда 18та мактаб қурилиши ва модернизация қилиниши ишлари олиб борилади. Кейинги 4 йилда эса 20тадан мактаб шу дастур доирасида қурилиши ва замонавийлаштирилиши кўзда тутилган.

14,7 минг таълим олувчи учун мўлжалланган янги ва реконструкция қилинган мактаблар янги ўқув жиҳозлари ва анжомлар, мусиқа асбоблари, компьютер ва бошқа техникалар билан таъминланади.

Қарор ижросини таъминлаш бўйича тузиладиган комиссияга Ўзбекистон ҳукумати бош вазири Шавкат Мирзиёев раҳбарлик қилади.