Рим папаси Франциск Африка давлатларига ташрифи давомида мусулмон ва насронийларни ака-укалар, опа-сингиллар деб атади, деб хабар берилмоқда ОАВларда.

Бу ҳақда понтифик Марказий Африка Республикаси (МАР) пойтахти Бангидаги масжидда мусулмонларга мурожаати вақтида айтиб ўтди.

Таъкидланишича, Рим папасининг масжидга ташрифи унинг Африкага сафарининг энг мураккаб қисмларидан бири бўлди.

Понтифик МАРнинг қуролланган гуруҳларини қуролни ташлаш ва “адолат, муҳаббат, раҳм-шафқат ва ишончли ярашув” билан қуролланишга чақирди.

Католик черкови раҳбари декабрда мамлакатда бўлиб ўтадиган сайловлар унинг тарихида “янги бобни” очишига умид билдирди.

МАРдаги жанговор ҳаракатлар оқибатида кўпчилик мусулмонлар Бангини тарк этишди, бироқ насроний милицияси билан ўраб олинган шаҳарда яна 15 мингга яқин мусулмон қолмоқда.