Туркия прокуратураси Сурияга юборилган юк машиналарининг ИШИД томонидан ушлаб қолиниши билан боғлиқ иш юзасидан қўлга олинган олий мартабали ҳарбий хизматчиларга айбловларни эълон қилди. Бу ҳақда Anadolu ахборот агентлиги хабар бермоқда.

2014 йилнинг январида Сурия билан чегарадош Адана ва Хатай вилоятларида туркманларга гуманитар ёрдам олиб кетилаётгани ИИВ томонидан иддао қилинган юк машиналари тўхтатилиб, текширувдан ўтказилган эди. Машиналар ичидан кўп миқдорда қурол-яроғ ва дори воситалари топилган эди. Миллий қонунчилик туркманларга ёрдам олиб кетаётган юк машиналарини текширишни ман қилишига қарамай, назоратнинг амалга оширилгани кўп баҳсларга сабаб бўлди. Ўша пайтда бир қатор журналистлар юклар аслида ИШИДга мўлжалланганини тахмин қилиб чиқди, бунинг натижасида Анқарани ИШИД билан ҳамкорликда айбловчилар сони ошди.

Мана иш юзасидан ИШИДга айғоқчилик қилишда гумон қилиниб генерал-майор Иброҳим Ойдин, бригада генерали Ҳамза Желепўғли, истеъфодаги полковник Бурҳониттин Жиҳонгирўғли ҳибсга олиндилар. Илгарироқ, ўтган ҳафтанинг пайшанба куни полиция Cumhuriyet газетаси бош муҳаррири Жан Дундор ва мухбир Эрдем Гулни ҳам қўлга олган эди. Улар ҳукуматнинг ҳаракатлари борасида ёлғон ахборот тарқатган мақолаларни тайёрлаш ва чоп этишда айбланмоқда.

Истанбул прокурори Ирфон Фиданнинг матбуотга берган баёнотига кўра, қўлга олинган зобитлар айғоқчиликда, террорчиликни ёқлашда ҳамда давлат тўнтаришини амалга оширишда айбланмоқда. Уларнинг барчаси шанба куни суд олдида жавоб беришди.