Туркия президенти Ражаб Тойиб Эрдўған Парижда ўтаётган иқлимий конференция доирасида журналистларга берган интервьюсида Россия томонидан расмий Анқарага қўйилаётган айбловларга жавоб берди.

Илгарироқ Россия президенти Владимир Путин Туркияни ИШИД билан ҳамкорликда, жумладан, террорчилардан нефть сотиб олишда айблаган, бунга жавобан Эрдўған, агарда айбловларга исбот келтирилса, истеъфо беришини таъкидлаган эди.

“Қонуний йўллар билан нефтни қаердан оляпмиз, табиий газни қаердан оляпмиз, буларнинг ҳаммаси маълум. Террорчи гуруҳлар билан бундай олди-сотди қиладиган даражада ғурурсиз эмасмиз. Буни ҳамма билиб қўйиши лозим”, - деди у.

“Бугун бу ерда бир гапни айтаман, - унинг сўзларини келтиради Hürriyet нашри. – Бундай нарса исботланган тақдирда миллатимиз ғурури шуни талаб қилади. Мен бу мақомда турмайман, аммо ҳурматли Путиндан сўрайман, сен ўз мақомингда қоласанми? Мен бу ҳақда очиқча гаплашаман”.