Германия ҳукумати Сурия ҳудудидаги ИШИД жангариларига қарши кураш учун ўз ҳарбийларини юбориш ҳақидаги лойиҳани маъқуллади. Бу ҳақда ҳукуматдаги ўз манбасига асосланган ҳолда Рейтер нашри хабар берган.

Spiegel маълумотига кўра, Германия Сурияга ИШИД жангариларига қарши кураш учун 1200 кишидан иборат ҳарбий бўлинма жўнатади. Бу ташаббус амалга ошган тақдирда Суриядаги контингент Германиянинг мамлакат ташқарисидаги энг йирик кучига айланиши мумкин.

Қуйи палатада бу лойиҳа 2 декабрь куни овозга қўйилади.

ИШИДга қарши кураш учун Германия хазинасидан 134 млн евро сарфланади. Ҳозирча бу миссия 1 йил учун мўлжалланган, аммо узайтирилиши мумкин.

Bloomberg нашри хабарига кўра, Германия Суриядаги ҳарбий амалиётларни қўллаб-қувватлаш учун "Торнадо" самолётлари, фрегат ва ёқилғи қуйувчи самолётлар ҳам юборади.

Ноябрь ойи охирида Германия канцлери бундесвернинг Суриядаги ҳарбий амалиётларга қўшилиши ИШИДга қарши курашда муҳим аҳамиятга эга бўлиши ҳақида айтганди.

Суриядаги жангариларга қарши Россия шу йилнинг 31 сентябрь кунидан бошлаб амалиётлар ўтказиб келмоқда.

АҚШ бошчилигидаги коалиция эса 2014 йилнинг кузидан буён Сурия ва Ироқда ИШИДга қарши ҳаводан зарбалар бериб келмоқда.