Англиянинг «Манчестер Сити» клубига эгалик қилувчи City Football Group концерни Хитойнинг China Media Capital холдинг компанияси билан ҳамкорликни йўлга қўйгани ҳақида хабар берди. Бу ҳақда инглиз клуби расмий сайтида маълумот берилган.

Манбада ёзилишича, CMC Holdings CFG нинг 13 фоиздан сал кўпроқ акцияларини 400 миллион доллар эвазига харид қилган. Ҳамкорлик бўйича музокаралар ярим давом этган.

Хабар қилинишича, City Football Group мазкур келишувдан тушган маблағни компаниянинг Хитойдаги ва халқаро бозордаги ривожи учун сарфлайди. Шунингдек инфраструктура активларини ривожлантириш учун ҳам маълум миқдорда маблағ ажратилади.

Маълумот ўрнида таъкидлаб ўтиш жоиз, City Football Group «Манчестер Сити», «Мельбурн Сити» (Австралия), «Нью-Йорк Сити» (США) ва «Йокогама Ф Маринос» (Япония) жамоаларига эгалик қилувчи концерн саналади.