НАТО ўзининг Афғонистондаги фаолиятини 2016 йил сўнггига қадар давом эттиради. Бу ҳақда НАТО Бош котиби Йенс Столтенберг ташкилотга аъзо давлатлар ташқи ишлар вазирлари учрашувида маълум қилган.

The Wall Street Journal нашри мухбирининг ёзишича, Афғонистонда бўлиб турган 12 минг ҳарбийдан иборат контингент ҳам сақлаб қолинади.

“Биз альянсга аъзо мамлакатларнинг ташқи ишлар вазирлари билан йиғилишда Афғонистондаги НАТОнинг инструкторлар ва ва маслаҳатчилар миссиясининг фаолият муддатини узайтириш масаласини кўриб чиқамиз ва у ерда иштирок этаётган кучлар даражасини ҳам муҳокама этдик. Якунда Афғонистондаги ҳарбийлар сонини 12 минг нафар миқдорида сақлаб қолиш қарори қабул қилинди”, деган Столтенберг.

Шунингдек, Бош котиб ташкилот аъзолари билан 2018 йилдан сўнг Афғонистондаги қўшин учун маблағ йиғишни бошлаш ҳам муҳокама этиилганини билдирган.