Нью-Жерси кўчаларидан бирида Саудия Арабистони фуқароси бўлган аёл, тиббиёт талабаси пичоқлаб кетилди. Айтилишича, икки жиноятчи унга таҳдид қилиб, яралаб кетишган.

Жароҳат жиддий бўлмай, қиз тез орада шифохонадан чиққан. Унинг соғлиғи жойидалиги у таҳсил олаётган Колумбия университети сайти орқали хабар берилган.
Номи келтирилмаётган қиз университетнинг тиббиёт коллежида тўртинчи курс талабаси. У ҳали турмуш қурмаган. Қиз хорижий тадқиқотлар учун Икки муқаддас масжид стипендия дастури асосида таълим олмоқда.

Қизнинг ҳикоя қилишича, икки киши унинг ортидан таъқиб қилиб, чекка жойда ҳужум қилишган. Жиноятчилардан бири арабча оҳанг билан, иккинчиси эса соф инглиз тилида гапирган.

Таъкидланишича, улар қизнинг буюмларига тегинишмаган, жинсий зўравонликни ҳам мақсад қилишмаган, шунингдек, ирқий ёки бошқа мазмундаги ҳақорат сўзларини ҳам айтишмаган. Шу боис ҳужумнинг мотивлари номаълумлигича қолмоқда.