"Оқ-тепа" клуби раҳбари Ғанишер Шоғуломов "Спорт" телеканалининг 30 ноябрь куни эфирга узатилган "Футбол шарҳи" кўрсатуви меҳмони бўлди ва жамоанинг молиявий ҳолати барқарор эканини билдирди.

"Сўғдиёна" билан бўлган ўйинда бизга бироз тажриба етишмади. Рақиб қандай ўйнаш кераклигини кўрсатиб берди. Ҳар ҳолда улар Олий лига тузини кўп татиб кўришган.

"Оқ-тепа" Олий лигада иштирок этадиган бўлсак, молиявий жиҳатдан ҳеч қандай муаммо бўлмайди. Футболни ривожлантириш бўйича қарорга асосан клубимизнинг ўз даромад манбаи бор. Клуб қошида қайта ишлаш заводи очилган ва унинг номи ҳам "Оқ-тепа".

Олий лигадаги кўп клублар ўзини эплай олмайди. Йил ярмига бориб футболчиларга ойлик бериш учун ҳам пул топа олмай қолади. "Оқ-тепа"да эса бундай муаммо бўлмайди. Биз Олий лигага чиқсак, бировдан пул сўрамаймиз, заводимиз тўлиқ бизни таъминлайди", - дейди Ғанишер Шоғуломов.

Эслатиб ўтамиз, "Оқ-тепа" клуби Биринчи лигада иккинчи ўринни эгаллагач, Олий лигага чиқиш учун "Сўғдиёна" билан ўтиш баҳсида куч синашган ва 1:2 ҳисобида имкониятни бой берган эди.

Матн: uff.uz