5-6 ноябрь кунлари Тошкентда ўтказилган Халқаро инвестициявий форум “Ўзбекистон темир йўллари” акциядорлик жамияти тизимидаги корхоналарни модернизациялаш, янги ишлаб чиқариш қувватларини ташкил этиш, тармоққа хорижий инвесторларни янада кенг жалб этишда муҳим аҳамиятга эга бўлди.

Форумда “Ўзбекистон темир йўллари” акциядорлик жамияти ва испаниялик ишлаб чиқарувчилар ўртасида яна иккита “Тальго” русумидаги поездни харид қилиш юзасидан шартнома имзоланди. Бу ҳақда “Ўзбекистон темир йўллари” акциядорлик жамиятининг юқори тезликдаги йўловчи поездлар ҳаракатини ташкил этиш ва фойдаланиш бошқармаси бошлиғи Олим Қурбонов УзАга маълум қилган.

"Янги поездларда аввалгилардан фарқли равишда йўловчи вагонларини яна иккитага кўпайтириш кўзда тутилган. Натижада икки локомотив, ўн йўловчи вагони ва вагон-ресторандан иборат янги поездда жами 287 йўловчини ташиш мумкин бўлади. Темир йўлларни электрлаштириш кўлами кенгайиши ҳамда юқори тезликда ҳаракатланувчи поездлар сонининг ортиши нафақат Тошкент, Самарқанд, Қарши шаҳарларида, балки бошқа ҳудудларда ҳам йўловчи ташувларини энг замонавий талаблар даражасида ташкил қилиш имконини беради", дейди у.

Унинг айтишича, инвестициявий форум доирасида “Ўзбекистон темир йўллари” акциядорлик компанияси хорижлик инвесторлар билан умумий қиймати қарийб 53 миллион долларлик англашув меморандумлари ва шартномалар имзолади.

Эслатиб ўтамиз, 2011 йилда Тошкент – Самарқанд йўналишида Испанияда ишлаб чиқарилган, икки локомотив, саккиз йўловчи вагони ва вагон-ресторандан иборат юқори тезликда ҳаракатланувчи “Afrosiyob” электропоезди қатнови йўлга қўйилган эди.