Тошкентда ва Ўзбекистоннинг бошқа шаҳарларида 1 декабрь, сешанба куни маҳаллий вақт билан 11:16 да кучсиз ерости силкинишлари сезилди.

Ҳозирча “Тошкент” сейсмик станциясида бу ҳақда маълумот берилмаган.

Европа-ўртаерденгизи сейсмология марказининг маълум қилишича, зилзила эпицентри Қирғизистон ҳудудида бўлган. Қўшни давлатнинг Жалолобод тумани ҳудудида 5,3 балли ерости силкиниши қайд этилган.

Ижтимоий тармоқларда Наманган ва Андижон вилоятлари ҳудудида зилзила кучи 2-3 балл атрофида бўлгани ҳақида тахминлар билдирилган.

Сўнгги кунларда Ўзбекистонда эпицентри Қирғизистонда бўлган бир неча зилзилалар сезилди. Жумладан, 17 ноябрь куни 22:29 да Тошкентда 2,5—3 балли, 20 ноябрь куни 9:46 да эса 2 балли зилзилалар сезилди. 21 ноябрь куни ҳам Тошкентда 2 баллдан камроқ, Наманганда 3 баллик зилзила сезилганди.

Эслатиб ўтамиз, бундан олдинроқ Ўзбекистон Фанлар Академияси Сейсмология институти Тошкентда 10 балли зилзила бўлиши мумкинлиги ҳақидаги гап-сўзларни инкор қилганди.