Самарқанд шаҳри яқинидаги "Фарҳод" шаҳарчасида кунига 500 тонна цемент ишлаб чиқариш қувватига эга улкан заводнинг қурилиш ишлари якунланди.

Хитойликлар инвестицияси (3 млн 345 минг доллар) ва "Фарҳод шифер" МЧЖ томонидан ажратилган 14,5 млрд сўм маблағ эвазига қурилган бу заводда Европада тайёрланган ускуналар ўрнатилган.

"Самаркандский вестник" нашри маълумотига кўра, "Фарҳод шифер" МЧЖ раҳбари Илёс Фаттоев корхонада ишлаб чиқариш 2016 йилнинг биринчи чорагида бошланади. Айни вақтда заводда хитойлик мутахассислар жиҳозлаш ва монтаж ишларини олиб боришмоқда.

Бу лойиҳа орқали 300та янги иш ўрни яратилиши кўзда тутилган.

Бироз аввалроқ, Ўзбекистонда айни вақтда 8,8 млн тонна цемент ишлаб чиқарилаётгани, 2020 йилда бу кўрсаткич 2 баробар ортиши ҳақида маълум қилинганди.

Айни вақтда Ўзбекистон бозорида 4та ишлаб чиқарувчи бор: “Оҳангаронцемент”, “Бекободцемент”, “Қизилқумцемент”, “Қувасойцемент”. Улар цементнинг 90 фоизини ишлаб чиқармоқда.